المنشطات و البطولات

المنشطات و البطولات ⛔ :

احنا هنوضح النهاردة عالم البطولات و الفيتنس و المنشطات و الهرمونات ⚠

أولا مش معنى ان احنا مابينبعش اى نوع من انواع المنشطات او الهرمونات او الكلين بيترول او الانافار يبقى احنا ضد الناس اللى بتستخدمها و بردو مش معناه ان الحاجات ديه أمنة و مش مضره او ان احنا هنبيعها فى يوم من الايام لانه عمره ماهيحصل لأ الحاجات دى مضرة و مضرة جدا جدا و كل الناس اللى بتستعملها عارفين كده كويس أوى و هما بياخدوا المخاطرة و بيستخدموها بس فى نقطة مهمة جدا جدا جدا.

❎ (أولا اللعبة دى محتاجة ايه) ❎:
1-التزام و انتظام (تمرين مظبوط- نوم مظبوط-أكل صحى)
2-تضحيات (مافيش سهر- هتفوت خروجات كتير – هاتقضيها لوحدك أوقات كتير)
3-فلوس ( أكل-مكملات- منشطات و هرمونات " لو هاتستخدم" )

الاول تسأل نفسك سؤال هل اللعبة دى هتبقى أكل عيشك يعنى هى دى اللى هاتعيش من وراها فلازم تدخل بطولات و تنافس عشان تكسب فلوس و يجيلك عروض من شركات و ممكن ربنا يكرمك و تسافر بره مصر مثلا فاهتصرف عليها بكتيييييير عشان تجيب مقابل فى الاخر و لا انت هاوى و بتحب اللعبة دى و عايز تطور من نفسك و يبقى شكل جسمك حلو مش أكتر.

🔥 (لو هى أكل عيشك و هاتبقى شغلك يبقى أنت كفيل بالتالى) 🔥:

هاتتمرن و تصرف فلوس كتير و تاكل كويس جدا و هاتضحى بحجات كتير و هاتضرب هرمونات و منشطات و هانيجى هنا لنقطة الجدل (الهرمونات و المنشطات) عشان الكلام يبقى واضح مافيش حد هاينافس و يوقف على المسرح و عايز ياخد مركز من غير مايضرب منشطات 95% من اللى بينافس و يدخل بطولات سواء اعترف بده أو لأ بيضرب و حد هايجى يقول طيب و التحاليل اللى بتتعمل دى كلها شكليات لا أكتر و لا أقل و ورق بيمشى, ده غير بقى موجة الفيتنس العارمة اللى فى العالم كله و تجسيدها بكلمة بطل كمال أجسام طبيعى او فيتنس موديل طبيعى زى بقى لازار أنجلوف , صادق هادزوفيتش , سيمون باندا, يوسيليس, تافى كاسترو, جيف سييد, و غيرهم كتير كل الناس دى بتاخد منشطات و هرمونات و الفرق بينهم و بين البودى بيلديرز هو نسب المنشطات اللى بتتاخد قد ايه و شكل الهيكل العظمى لكل بنى أدم و كتلته العضليه قد ايه و هل ده ينفع يدخل تحت بند البودى بيلدينج و لا هو أخره فيتنس و لا موديل ,المنشطات و الهرمونات دخلت اللعبة دى من زمان و غيرت تغيير جزرى فيها بس للأسف شركات المكملات الغذائية و المجلات و الميديا بشكل عام بتستخدم صور ناس بتاخد منشطات و توهم الناس انها هاتوصل كده بمجرد انها تاكل صحى و تستخدم مكملات غذائية لكن ده مش حقيقى الجسم الطبيعى للبنى أدم ليه أخر و المنشطات و الهرمونات دى بتوصل الجسم فوق قدرته و بتدفعه لمنطقة فوق الطبيعى و بتوصله لشكل لا يمكن اى بنى ادم يوصله لو فضل يتمرن و ياكل صحى طول حياته و الصور اللى بتستخدم فى المنتجات هى لا أكثر من انها جذب اعلانى و تسويق لان العين بتحب شكل الاجسام دى حاجة كده اسمها البحث عن الكمال فى الجسم الأنسانى انك تشوف كل عضلة ظاهرة و واضحة و عشان كده مينفعش حد يجى يجيب صورة واحد على منتج و يقولنا أنا عايز ابقى زى ده بكل صراحة بنقولها للناس مش هاتبقى زيه, ده مش معناه ان الناس اللى بتستخدم المنشطات دى وحشة لأ لأ لأ , الناس اللى بتستخدم المنشطات و الهرمونات ناس عاقلة و واعية و عارفة ايه اللى ممكن يحصل نتيجة استخدامهم ليها و الكلمة المشهورة لو مش قد ترويض الأسد ماتدخلش القفص, لو هاتستخدم المنشطات و الهرمونات يبقى انت واحد هايعرف ياكل كويس و ينام كويس و يصرف كتييييير نركز على ديه يصرف كتيييير يعنى هاتصرف أكل و مكملات و منشطات و تنضيف و تحاليل و تتابع مع مدربين متخصصين و تدفعلهم فلوس عشان تتابع معاهم كل الحاجات اللى بتستخدمها لان الموضوع لازم يكون فيه متابعه جيدة جدا لان اى غلطة بيبقى فى خطر على الصحة.

الناس اللى بتضرب و بتدخل بطولات بتتعب و بيطلع عينها عشان فى ناس برده فاكره انه بينام يصحى يلاقى العضلة طالعة لوحدها لأ الكلام ده فى الحلم الناس دى بتتعب و قبل البطولات اللى هو وقت التجهيز و بالذات فى فترات التنشيف قبل البطولة الموضوع بيبقى صعب و بيبقى فى تنظيم للكربوهيدرات و التمارين و قطع الماء و تقليل الكربوهيدرات و تزويدها و موضوع معقد و محتاج صبر و جهد و عزيمة فالناس دى ليها كل التحية و التقدير و الأحترام لان الموضوع ده مش اى حد يقدر يعمله فعليا الموضوع صعب جدا جدا و كله ارهاق بدنى و ذهنى و صرف فلوس كتير.

🔥 (لو أنت هاوى و بتحب اللعبة مش أكتر) 🔥:

بيجيلنا ناس كتير بيكون لسه بقاله شهر بيلعب أو لسه هايبتدى و يورينا صورة لواحد مثلا زى لازار و لا سيمون باندا و يقولنا انا عايز ابقى كده او واحد تانى يقولنا انا خدت تيستوليك و اندروليك و بربونات و ديكا هولندى و مش عارف ايه هندى و هو أصلا مش عارف ايه اللى بياخدوا و لا فاهم يعنى ايه تمرين و لا يعنى ايه رياضة , أقسم بالله الناس دى فعليا بيصعبوا علينا جدا و العيب مش عليهم لوحدهم هو العيب عليه و على قليل الضمير اللى باعله و الناس دى حسبى الله و نعم الوكيل فيها اللى بتحقق اى ربح مادى و مش مهم بالنسباله الشخص اللى قدامه و لا صحته و هل ده ينفعله ولا لأ او هل هو على دراية كاملة باللى بياخده ولا لأ و هل هو فى مستوى يسمح أصلا انه يستخدم منشطات و لا لأ ماهو ماينفعش تجيب واحد بيتمرن يومين تلاتة فى الأسبوع و مش مهتم بأكله و بياكل اكل من بره و مابينامش و مقضيها سهر و تقولى ياخد قرص فى شهر و هوبا يبقى جريندايزر الكلام ده مش حقيقى و لكل الناس اللى بتدور على مكاسب سريعة و سهلة نحب نقولهم مش هاتحققوها الموضوع صعب و عايز جهد و وقت و تمرين و انتظام.

انت لو هاوى و بتحب اللعبة و مش همك البطولات يبقى مافيش اى مغزى انك تستخدم منشطات او هرمونات و تاخد مخاطرة بحاجة زى كده فى حياتك و صدقنا انت لو مش راضى عن شكلك ايا كان هو ايه حتى لو عملت جسم حلو هاتحس بحاجة نقصاك حب جسمك و شكلك و مش عيب انك تطور من نفسك و تطمح للأحسن بالعكس ده هو ده الصح و المفروض انك تطور من نفسك و تطمح للأحسن دايما و ممكن تعمل جسم حلو بالأكل بس و جسم أحسن بالاكل و المكملات و جسم فوق الطبيعى بالمنشطات و الهرمونات الموضوع كله انت و شطرتك و مدى التزامك و صبرك و حبك للموضوع و الهدف اللى انت عايز توصله فى المجال ده , اللعبة دى محتاجة لعب و انتظام و صبر و لو سيبتها هاتسيبك عالطول مابتهرجش و أنت الللى هتحدد هل فعلا يستحق انك تعمل كده و لا لأ و ده بيتحدد من نفسك انت بس مش اى حد تانى و لا أى شخص يلعبلك فى دماغك الوحيد اللى هايعرف يقول هل الموضوع يستحق بالنسبالك التضحيات اللى هاتعملها و لا لأ هو أنت , أنت بس .

🔥 (مش كل الأجسام تنفع للمسرح) 🔥 :

الجملة دى اللى يفهمها صح هايريح دماغه و تفكيره و هايفهم الدنيا ماشية ازاى و هايفهم اللعبة دى محتاجه ايه و ايه التضحيات اللى هايقدمها و هل هو عايز كده و لا لأ.

ربنا خلق الانسان كل واحد فيه ميزة عن التانى و كل واحد ربنا مديله موهبة فى اللى بيكتشف موهبته و بيأمن بيها و بيشتغل على نفسه و فيه اللى بيعيش و يموت و ماعرفش موهبته, بنشوف ناس كتير بتطلع على المسرح و جسمها مش مناسب بالمرة و لا تصلح انها تطلع توقف فى بطولة و لا هما مجهزين و لا فى تناسق عضلى و لا أى حاجة خالص و بيسببوا لنفسهم الأحراج و التريقة و للأسف فى ناس أجسامها لا تصلح للعبة أصلا سواء من حيث البنيان الجسمانى يعنى ربنا خلقه قصير, مش عريض , الهيكل العظمى مش ضخم , الجينات مش مساعداه فى اللعبة , الجينات ليها عامل مهم جدا و بعض الأشخاص بتعتقد انها لما تاخد منشطات او هرمونات هتتحول و تبقى حاجة تانية و الواحد شاف ناس كتير اخدت كمية منشطات و هرمونات و أجسامها ماتحولتش خالص و لا كأنه اخد حاجة ده بالعكس ضر جسمه و حالته النفسيه باظت بعد كل الصرف ده و التعب و مافيش نتيجة, و دى جزئية ان مش كل الاجسام تنفع للمسرح ربنا ماخلقش الناس كلها متساوية مش معنى انك مش قادر تبقى بودى بيلدر او فيتنس موديل يبقى انت مش كويس او مش قوى لأ أنت ممكن تبقى بارع فى لعبة تانية زى مثلا الجرى او السباحة او سباق الدراجات , دور على لعبة تانية كون شغف و حب للعبة تانية ماتنساقش ورا الصور و المجلات و الميديا بس اللى مصورالك الفيتنس موديل ده حاجة جاية من القمر الفلوس و الشهرة مش كل حاجة الناس دى برده بتعانى من حاجات تانية كتير و انه يفضل محافظ على نسبة دهون قليلة بين 7-10 % طول السنة عشان عنده تصوير و بطولات و مقابلات الموضوع صعب جدا جدا جدا عكس الناس ما شايفة من بره , المسرح و البطولات ليهم مخاطرهم و متعتهم لو قدهم و قد المسؤلية و المخاطرة بتاعتهم ادخل لو مش قدها بلاش أحسن.

العظيم "ريتش بيانا" و ده من أحسن الناس كمصداقية فى جزئية الهرمونات و المنشطات و معترف انه بيستخدمها لانها حاجة متستخباش و كان بيحكى عن اول مسابقة دخلها و هو جسمه طبيعى و ازاى خسر فيها لأنه كان نازل قدام ناس بتستخدم منشطات اللى هو العادى فى عالم البطولات و الناس اتريقت عليه و هو ماكنش يعرف ان الموضوع كده و فاكر الحياة لونها وردى و هو قرر بعد البطولة دى انه هايعمل اى حاجة و هيضحى و هايستخدم اى منشطات أو هرمونات عشان يوصل و من هنا ابتدت رحلته مع المنشطات و عرف انه مستحيل يقارن بين الأجسام الطبيعى و الأجسام اللى بتستخدم المنشطات لان المنشطات بتوصل الجسم لشكل مستحيل يوصله الأنسان الطبيعى مهما كانت جيناته.

المنشطات فى ناس كتير بتستخدمها و مابيحصلهاش أى حاجة و بتعمل أجسام ماشاء الله هايلة و فى ناس بتتبهدل و تدخل المستشفى و بيجيلهم امراض مزمنة , المنشطات عايزة متابعة و تحاليل أول بأول و تركيز فى أكل و نوم و تمرين لانها مش هزار و لو هتبقى دى حياتك و اكل عيشك و هاتلتزم و تبقى قد المسؤلية يبقى مافيش مشكلة و لو بردو مش أكل عيشك و هاتقدر تصرف عليها و تعمل التحاليل و تتابع مع مدرب خاص و دكتور و تفضل محافظ على صحتك يبقى بردو مافيش مشكلة لكن غير كده مالهاش اى مغزى و لا سبب انك تدخل فى عالم المنشطات و لا تاخد المخاطرة دى انت لو بتلعب عشان بس تظبط جسمك و تعمل فورمة حلوة يبقى تنتظم فى تمرينك و أكلك رقم واحد و بعض المكملات تساعد مش أكتر غير كده لو فاكر هاتضرب كورس تبقى سوبر مان يبقى بنقولهالك من الاول بلاش, "اللهم بلغنا اللهم فاشهد".

نحب نقدم تحية لكل الناس اللى بتنافس و بتقدم فى البطولات و اللى بيضحوا بحجات كتير عشان يحققوا اللى مؤمنين بيه و مابيخدعوش حد و يقولوا انهم مش بيضربوا و تعالى هوصلك للجسم ده طبيعى تحية تانى ليهم و لصدقهم و مسؤليتهم عن تصرفاتهم و احترامهم لعقليات الناس.
و نحب نقول للناس اللى عايزة تاخد الطريق السهل و فاكرة ان المنشطات و الهرمونات هى الحل فكر كويس و شوف المخاطر و الفوائد اللى هاتعود عليك من الموضوع لو مش قدها بلاش أحسن و النصيحة دى لله.
حاجة أخيرة نحن لم و لن نبيع أى نوع من انواع المنشطات أو الهرمونات او الكلين بيترول أو الانافار.
احنا بتوع المكملات بس