وقفنا المرة اللي فاتت عند كيفية التمرين اثناء الكورس ...
انهاردة احنا هنعرف اسلوب التغذية اثناء الكورس 
مهما كان غرضك من الكورس سواء كان ضخامة او تنشيف او عضل صافي بدون دهون فأنت لازم هتمشي على نظام غذائي محكم او على الاقل شبه محكم عشان تشوف افضل نتايج من الكورس بتاعك والنظام ده هنسميه دايت , شاع اوي وسط الناس ان دايت دي يعني بخس او بنزل دهون وده فكر خاطئ تماما يعني انا مثلا في التضخيم عامل دايت في التشريح عامل دايت اللي حدد اي نوع من الدايت ده هو اكلي والمكملات بتاعتي ...
المهم تعالوا نتخطى المقدمة العقيمة دي ونتكلم في صلب النقطة اللي انا بعتبرها اهم حاجة في الكورس الهورموني , الكورس الهورموني مايكون محكم من غير نظام غذائي ودايت محكم ..
ظبطت كورس هورموني تمام , واتمرنت تمام التمام زي ما الكتاب بيقول وارتحت تمام التمام انسى اي نوع من انواع العضلات في جسمك لو ما مشيتش على نظام غذائي بالورقة والقلم ( يعني يكون مظبوط بكميات البروتين , والكارب , والدهون المفيدة ) وده موضوع هيساعدك اوي عشان تقدر تعرف انت شكل الدايت بتاعك في الكورس هيكون عامل ازاي
كتير اوي مننا مفكر ان المنشطات دي الساحر اللي هيخلي الجسم زي الابطال او هو اللي هيدينا الحجم العضلي المرغوب فيه بدون تعب او بفترة قليلة وده تفكير غير سليم انا مع اي واحد بيقول ان المنشطات هي الساحر ده كلام حقيقي
بس المنشطات من غير الدايت المناسب للجسم والغرض من الكورس عاملة زي الساحر اللي من غير تعويذة يعني من الاخر ملهاش اي لازمة يعني هترجع للمبدء العام للعبة
تغذية + تمرين + راحة + ( المنشطات ) = حجم عضلي عالي مع افضل تناسق للشكل البنياني للجسد
اي خلل في نقطة من دول مش هتشوف اي نتيجة , مع الفارق طبعا انك لو ما اخدتش منشطات عادي ممكن تعمل شكل تمام برده بس احنا في موضوعنا بنتكلم عن دور المنشطات والمعلومات عنها والتعليمات الجاية دي عن نظم التغذية هتفيدك اوي اوي كبداية للتعرف على نظام التغذية المناسب ليك وازاي تبنيه بنفسك :
كل وجبات اكتر خلال اليوم : 
واحد يقولي يا صاحبي انا اصلا باكل وجبتين وعامل زي الجاموسة , بومبو معلش انت ممكن تاكل وجبتين تنتشلك فيهم 3000 سعر ولا حاجة وجسمك ما يستفيدش منهم بأي حاجة يعني ...
معظم الناس في العالم ككل بيبدأ يومه بوجبه فطار خفيفة جدا جدا ايام العمل و احيانا مش بيكون في فطار اصلا وبعد ما يرجعوا يضربوا الغدا التمام التقيل فحت , ويترمي على السرير او ما يترميش وبعد كده العشا التمام وينام وهلم جرة
والجدول الغذائي دي الناس فرضته على نفسها بحكم العادة واوقات العمل وده شيء خاطئ جدا وبالعكس بيؤدي متأخر الى مشاكل في الصحة واحيانا الى عادات غير صحية يعني مثلا في ايام الراحة تلاقي الواحد ضرب الفطار المتين , وما يتغداش يقوم يخلي الغدا في وقت متأخر من الليل يقوم ضارب الغدا الممتين بالليل وسلملي على التروماي حوالي 1000 سعر على اقل تقدير في بطنك وانت بتقول يا نوم كل ده هيروح فين غير مخازن الطاقة ؟ بالبلدي يعني الجسم هيحتفظ بيه كدهون ..
اما لما تاكل حوالي 5 او 6 وجبات في اليوم , فأنت بكده بتدي لجسمك الوقت الكافي انه يستفاد من كل وجبة على حدا ويكون معدل الحرق في جسمك اعلى لان معتدك شغالة على طول وجهازك الهضمي شغال اول بأول يعني جسمك مش مريح من الاخر بغير ان الانسولين هيتحرر في جسمك ويقدر ينقل الاحماض الامينية والغذاء للمستقبلات في العضلات ...
كل بإنتظام :هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 600x350 .
كتير من الناس بتفكر ان الدايت هو انت بتاكل ايه او بتاكل قد ايه , هي الفكرة ان اهم حاجة انت بتاكل امتى ... في دراسات اثبتت ان جسم الانسان ردة فعله للحرق والاستفادة بالغذاء لما بيكون الاكل في جدول منتظم .لما اكلك بإنتظام في نفس المواعيد كل يوم هيخلي الجسم يستفيد الاستفادة المثلى من النظام الغذائي بتاعك
وبالتأكيد كلنا في اشغالنا طيب هنظم ده ازاي ,
الأكيد ان فطارك وعشاك دايما في نفس ذات الوقت مفيش فيه كلام ..
الاشكال في الوجبات اللي في النص , والكلام اللي هقوله ده لواحد عنده عزيمة انه يوصل لهدفه يعني لو قولت يا كوتش ازاي وماينفعش يبقى ما تكملش الموضوع وروح نام في بيتك احسن ..
السناكس دي لا غنى عنها في اي نظام غذائي .
والسناكس دي عبارة عن اي وجبات خفيفة ( فواكه , مكسرات ] وهي الافضلا في هذا المجاال[ , ساندويتشات فطائر )
دي لازم تكون في شنطتك طول مانت بره البيت يعني وانت بتعمل نظامك الغذائي لازم تكون عارف انت بتخرج امتى وبترجع امتى وهيفوتك كام وجبة وانت بره تعمل حسابهم في شنطتك وهي وجبة واحدة اللي هتكون محتاجها معاك اللي هي وجبة الغدا وزي ما قولت المكسرات هي وحش الاسناكس كلها واللوز اهم حاجة فيهم كلهم
وطبعا مش محتاج ان الساندويتشات مش طعمية وفول ولا هامبورجر ولا زينجر ساندويتشات تونة ( اه وراك وراك ) او فراخ مسلوقة او مشوية
وطبعا الشيكر في الشنطة على طول من غير كلام ...
كده هتلاقي نفسك ظبطت يومك وسعراتك
اوبس صحيح يا كوتش السعرااااااااااات ...
لازم تزود سعراتك اثناء الكورس يعني الطبيعي الانسان بياخد من 2000 او 3000 سعر حراري في اليوم وده الطبيعي ...يعني المفروض اثناء كورسك يا حلو تاخدلك حوالي 5000 سعر حراري في حالة غرضك يكون الضخامة المناسبة بس ده معناه انك تكون بالصلاة على النبي بلاعة او مقلب زبالة رفع الله قدركم , لا انت برده بتكون عارف انت بتاكل ايه وامتى والا في اخر الكورس هتلاقي نفسك خزان بالصلاة على النبي
اظن احنا فركنا النقطة دي حكايات وكلام البروتين هو اساس تغذية اي لاعب كمال اجسام يعني مش الاقي واحد عامل دايت 6000 سعر حراري5800 منهم كارب و دهون كلام لا يعقل يعني ومع ذلك نتكلم شوية عن البروتين
البروتين تكمن اهميته في انه بيتكسر ويتحول لاحماض امينية اللي هي اساس التكوين العضلي فتخيل اهمية انك تبني نظامك الغذائي على نظام البروتين العالي واهم مصادر البروتين في الاكل هي :
السمك , البيض , اللحمة , الفراخ , التركي ( الديك الرومي يعني ) , واللبن وما الى اخره ...
وافضل شيء انك تحسب قيمة البروتين اليومي من احتياجاتك بناءا على 1,5 جرام بروتين لكل باوند في جسمك , اه طب احنا عارفين الكيلو طب ايه الباونت ده ... عشان ما تقرفش نفسك خدلك 3 جرام بروتين لكل كيلو من جسمك واحسب بقى انت محتاج قد ايه ...
مش معنى الكلام ده اني انفض للكارب , بالعكس الكارب لا تقل اهميته عن البروتين اطلاقا , بعد ما نفخت العجل بتاع العربية هتدورها ازاي ؟
الكارب ده هو اساس الطاقة المستمدة اثناء التمرين وهو اللي بيظبط معدلات السكر في الدم وحرق الدهون , والطبيعي 800 او 900 جرام كارب في اليوم تكون تمام ومن المصادر الغنية بالكارب المعقد اللي المفروض يكون 85% من احتياجك اليومي هو التالي /
الحبوب الكاملة , الرز ( البني ) بالله عليكو ماحدش يقولي ده رز الصيادية هههههههههههههههههههههههه
الرز البني ده رز كامل الحبة برده غلبت فيه هات رز بسمتي ..
الشوفان , المكرونة كاملة الحبة برده وبتكون بني بس اغمق من العادية والخضروات
ومن امثلة الكارب البسيط المفروض انه يمثل 15% من احتيايك اليومي من الكارب الفواكه والبطاطس
ودي كانت نظرة سريعة على التغذية بدون تعمق لأنها برده بعيد الى حد ما عن الموضوع الرئيسي ,
كده احنا اتكلمنا على الكورس ومعناه ويعني اي استاك المنشطات واتكلمنا عن فترة التنضيف لكن ما عرفنهاش او ما اتكلمناش عنها بتفصيل ده اللي احنا هنتاوله دلوقتي ....
فترة التنضيف او المعروفة دوليا بإسم فترة PC T او POST CYCLE THERAPY 
لو كلنا كنا قرينا عن الموضوع الأول اللي هو كيفية عمل المنشطات في جسم الانسان كنا هنعرف ان جسم الانسان لما بيستقبل هورمون جاي من بره هو بينتجه الجسم بيميل الى الراحة ويوقف انتاج الهورمون داخليا ويعتمد على الدعم الخارجي له وده اللي بيحصل فعلا اثناء الكورس ان في الكورسات الجسم بيوقف انتاج التيست تماما ( لأنه لا يوجد كورس هورموني بدون تيست وهنتناول ده بالتفصيل بعدين ) وده الهورمون المسئول عن العملية الجتسية وبناء العضلات ونمو الشعر كل حاجة تخص الذكورة فتخيل يا سكر جسمك وقف انتاجه من الهورمون ده بقيت سوسن هههههههههه
, لا متخافش عشان كده لازم ندخل حاجة اسمها فترة التنضيف وانا الصراحة مش بحب الإسم ده لأن عملية التنضيف بتكون من سموم او الزبالة اللي مسببها الكورس وده فعلا الجسم بيقوم بيه تلقائيا اثناء الكورس الهورموني والكبد بيتخلص من السموم دي زي ما قولنا قبل كده عن طريق الرئتين او الجلد مش عارف العرب جابو منين التنضيف بس ما علينا هو ده الاسم المتعارف عليه وبلاش حد يقوله يعني حرصا من الدي في دي على عدم تفشي الفيروس ههههههههههههههه
على الرغم من النتايج من الكورس الهورموني مذهلة جدا وايجابية الى حد كبير الا ان الاثار السلبية الناتجة عنها مؤذية على مدى برده مش سهل فلازم عشان كده وانت بتحضر للكورس بتاعك تكون مجهز نفسك انت هتواجه الاثار السلبية بتاعته ازاي وانت بتعرف الاثار السلبية بتاعة كل منشطة من حاجة اسمها البروفايل بتاعة المنشطات وان شاء الله في اخر الموضوع هننزل بروفايلات معظم المنشطات المتداولة حتى تعم الفائدة ( البروفايل ده بيكون مقالة مكتوب فيها كل حاجة عن المنشط بينتمي لاي مجموعة ووظيفته اي واثاره السلبية ايه ومعلومات كتير عنه عشان تبقى عارف انت بتعمل ايه )
جسم الانسان سبحان الله في حاجة اسمها الميزان الهرموني يعني فيه ميزان بين هورمون التيست ( الذكورة ) وهرمون الاستروجين ( هرمون الانوثة ) ولما بتاخد نسبة تيست من بره الجسم زيادة على النسبة اللي الجسم بينتجها بيضطر الجسم انه ينتج فائض من الاستروجين عشان يعادل نسبة التيست الموجودة داخل الجسم ولما التيست في جسمك هوب اتوقف بيكون جسمك فيه الاستروجين هو الاعلى وده اللي بيدي الاثار السلبية زي نمو الثدي او الجينو ولما بتطبل الكورس مع اخر حقنة تيست بيكون جسمك اصلا وصل لمرحلة انه بقى يعتمد اعتماد كلي على التيست الخارجي اللي انت بتاخده من الكورس وساعتها ولا بيكون في خارجي ولا داخلي وبيكون في الاستروجين لوحده اللي هو هرمون الانوثة وتخيل بقى جسمك بدون تيست اللي هو المسئول الاول والاخير عن عملية بناء العضلات هيكون فيه نسبة الهدم عالية جدا جدا وده معناه ولا التغذية ولا الراحة هتنفع في افادة الجسم او حماية العضلات الا انك لازم تاخد هرمونات تاني عشان تقدر تساعد جسمك في ارجاع معدلاته الاصلية , طب هتاخد ايه المرة دي وهترجع ازاي ...
فاكر موضوع انك تاخد تيست يقوم الجسم يقلل التيست في الجسم لاقل نسبه حتى ينعدم ويقوم الجسم ينتج استروجين عشان يعادل النسب الزيادة ؟
هتعمل نفس الفيلم ده بس هتاخد استروجين خارجي , يقوم جسمك يوقف انتاج الداخلي ويرفع نسب التيست عشان يعادل النسبة الموجودة الحالية في الجسم ...طب ازاي هتاخد استروجين خارجي ومش هتعاني من اثاره الجانبية اللي انا اصلا باخد الاستروجين عشان اوقفها زي حبس الماء وتخزين الدهون والجينو .. في نوع مخصص من الاستروجين اسمه السيرمز والنوع ده بالذات بيعمل عمليه غريبة جدا في الجسم واللي المفروض كلنا نرفع القبعة لمكتشف العملية دي وهي انه بيقفل جميع مستقبلات هرمون الاستروجين في الجسم اللي هي مسئولة عن الاعراض الجانبية من الاستروجين اللي احنا مش عاوزينها ومن اشهر السيرمز الموجود والمستخدم دوليا الكلوميفين سيرات او التيموكسيفين ودول في العادة بيتاخدوا في اخر اسبوعين في الكورس وكام اسبوع بعد لحد ما يرجع نسب التيست الى اصلها من تاني وانك تاخد واحد او الاتنين دول مع بعض هيظبط الدنيا في موضوع الاثار الجانبية من هورمون الاستروجين
والمادتين الفعالتين دول موجودين في الاشهر استخداما دوليا برده
التيموكسيفين ( النولفاديكس )
الكلوميفين سيرات ( الكلوميد )
وده سر اخد الاتنين دول في اي فترة PCT ( ماشي بالله ؟ بي سي تي مش التنضيف ) هههههه
في حاجة غلط كتير او من الكباتين بتقع فيها , ان الاستروجين هو المسئول عن عملية الهدم في فترة ما بعد الكورس وده فكر خاطئ وغير صحيح وانما هي عملية تانية بتكون موجودة في الجسم اثناء الكورس ولما التيست بيخلص بتبقى العملية دي شغالة وهي المسئول عن الهدم ....
وده هنتكلم عنه في البقية ان شاء الله
ليست هناك تعليقات: